Faturât di 4,1 miliarts, in cressite dal 13% a pet dal esercizi di prime, profit net di 243,6 milions di euros (plui 11%), margjin operatîf sporc a 423,9 milions, miorât dal 18% e tacuin ordins passât di 5 a 6,2 miliarts di euros. A son numars di insuazâ pal esercizi consolidât ai 30 di Jugn dal 2023 chei regjistrâts dal Gruppo Danieli, cun faturâts e margjins che a cuvierzin i invistiments fats e lis grandis spesis in ricercje e disvilup. A cressin di 637 unitâts ancje i dipendents, rivâts a 9.732.
Danieli e je premiade intal marcjât internazionâl pes tecnologjiis inovativis proponudis, tacant di Digimelter, une piere miliâr di sostignibilitât a nivel mondiâl, che pe prime volte e permet di alimentâ la fusion dal açâl in maniere direte cun energjie eoliche e solâr e che in maniere progressive e cjaparà il puest dai fors eletrics tradizionâi, intal percors bande lis ‘emissions zero’. “Il sucès al è cussì clar – si lei inte note dal Grup – che i concorints a àn abandonât lis lôr tecnologjiis par copiâ lis nestris”.
I implants Danieli a concuistin il marcjât in graciis de competitivitât che a garantissin, sedi pal cost par tonelade di açâl prodot, sedi pe riduzion des emissions di Co2. (a.d.g.) – 27.09.23
