Une cunvigne par ricuardâ Giacomini

Il CIRF de Universitât dal Friûl al inmanee un event par ricuardâ il scritôr, poete e filolic furlan Amedeo Giacomini. Miercus ai 29 di Novembar aes 4 dopomisdì, li dal auditorium de Biblioteche dal Pôl Sientific dal Ateneu, si davuelzarà la cunvigne dedicade al leterât nassût a Vildivar, che al è stât tra i protagoniscj plui significatîfs de culture furlane tal ultin cuart dal secul passât, e docent di Leterature furlane intal Ateneu udinês. I intervents a permetaran di cognossi miôr diviers aspiets de sô produzion leterarie, fra chescj il so prin romanç “Manovre” (1967), lis oparis di poesie “Presumût unviâr” (1987) e “Tal grin di Saturno” (1990) e la sô traduzion par furlan dal poemut in dialet venit di Andrea Zanzotto “Mistieròi/Mistirùs” (1984). La cunvigne e je a jentrade libare e e je vierte a dutis lis personis interessadis. I intervents dai relatôrs a saran metûts adun intun volum che al sarà publicât inte golaine dai Cuaders dal CIRF. (A.I.) – 28.11.2023