Mascaris in mostre in regjon: si tache di Cividât

Valorizâ e divulgâ la tradizion de mascare taliane puartant in Friûl-Vignesie Julie une manifestazion fate di esposizions, simposis e laboratoris sul teme. Chest l’obietîf dal progjet “MISMÀS-cherati”, fat de associazion Maschera Scenica. Di Mai fint a Avost, cuatri localitâts dal Friûl-Vignesie Julie (Cividât, Tumieç, Pordenon e Gurize) a saran protagonistis de rassegne, che e vûl slargjâ la cognossince su la mascare taliane (e no dome) e contâ cemût che vuê e ven pensade. La rassegne (a jentrade gratuite) e partirà di Cividât li dal Centri Internazionâl Vittorio Podrecca – Teatri des maraveis di Maria Signorelli dai 5 di Mai e fin ai 29. In program ancje doi simposis in rêt. (A.I.) – 04.05.2023