Laureâts e insegnants a studiin Pasolini a Cjasarse

Si è vierte une setemane penze tal segn de formazion di alt nivel pal Centri studis “Pasolini” di Cjasarse. Di miercus ai 6, 25 laureâts o dotorants di diviers ateneus di Italie e di Europe a cjaparan part ae seste edizion de “Scuele Pasolini”, calcolade tant che un dai apontaments talians plui prestigjôs di alte formazion tra chei dedicâts al poete e inteletuâl, chest an incentrade sul teme “Pasolini e lis formis dal teatri”. Di lunis ai 4, cun 64 docents di variis regjons di Italie, si rinove pal cuart an ancje une altre esperience uniche: il percors di formazion par insegnants des scuelis secondariis di prin e secont grât, che a podaran acuisî competencis e esperiencis buinis tal insegnament di Pasolini ai lôr students. (A.I.) – 04.09.2023