Dj Tubet al insegne il rap ai students intal Museu Etnografic

In ocasion de Fieste de Patrie dal Friûl, i Museus Civics di Udin e l’ufici pe lenghe furlane Furlan in Comun a proponin une schirie di iniziativis dedicadis ai fruts e aes scuelis. Al Museu Etnografic dal Friûl di Palaç Giacomelli e je stade metude sù une piçule mostre dedicade aes publicazions in lenghe furlane pai plui piçui. I grups di fruts e frutis in visite a àn la oportunitât di partecipâ in maniere ative al laboratori “didascaliis che a fevelin”, dant un non ai ogjets des colezions dal museu intune o in plui lenghis, tacant propit dal furlan. I laboratoris a son par cure dal musicist furlan Dj Tubet, che cu la sô “Hip Hop Pedagogy” – a tacâ di vinars ai 24 di Març e fin ai 28 di Avrîl – al darà vite a un percors di svicinament e di interpretazion dai materiâi tal museu citadin, ancje midiant de musiche rap e des rimis improvisadis. Cul progjet “Un glimuç di peraulis – Racconti e tesori da scoprire al MEF”, i lûcs, i libris, i ogjets e i bens che si cjatin tal museu a deventaran ideis creativis pe improvisazion in ‘freestyle’, messedant e riproponint i temis fondamentâi. (A.I.) – 23.03.2023