CREAttivo, la art di stâ in ecuilibri

E je dedicade chest an ae ricercje di stabilitât che e je daûr dal progjet stes – une colaborazion jenfri art, imprese, dissen e didatiche di alte formazion par valorizâ art, industrie e artesanât – la setime edizion di CREAttivo, nassût di une idee di Sabrina Zannier, prodot di Maravee Projects cu la poie de Regjon e la colaborazion de Fondazion Aquileia, la Scuele dai mosaiciscj dal Friûl e lis aziendis Legnolandia, Gervasoni e Very Wood. “Ecuilibrisims in zûc al è il titul” di chest, an, un sunt di dut il progjet che al passe pai lengaçs dal circ e des acrobaziis, tant che metafore ironiche de ricercje – simpri plui dificile – di stabilitât al dì di vuê. La prime part dal progjet e sarà un spetacul in program par domenie ai 14 (e no joibe 11, daûr dal program origjinâl, par colpe dal brut timp) a Aquilee, tal viert, te zone archeologjiche dal fonts Cal, cui artiscj Alessandro Zanutto e Alessandra Ricci devant dal public. Tal mês di Otubar a Gardiscje (cjase Maccari) si vierzarà la mostre “CREAttivo #7”, cui lavôrs dai cinc vincidôrs dal concors de Scuele mosaiciscj, intant che a Aquilee si screarà il gnûf percors dal parc CREAttivo, viert dal 2023, là che a son propit gnûfs zûcs di ecuilibri. In Dicembar, simpri a Aquilee, une cunvigne pai 27 agns de citât patrimoni mondiâl Unesco. (A.I.) – 09.09.2025