La ricualificazion de zone e je cuasi finide e dut il borc a est di Udin dongje vie Cividât, là che une volte e jere la caserme “Osoppo”, une des plui grandis, al è pront par deventâ une part di che “citât sperimentâl” gnove fate di palaçs cun 76 apartaments, une place par spetacui tal viert, zardins, cjamps par zuiâ e fâ sport, stradis dome par bicicletis… Al centri, un edifici che al è stât dut ristruturât (2,5 milions di spese pai lavôrs), cognossût cul non di “Cavallerizza” parcè che dentri a jerin i cjavai cuant che la caserme e jere vierte. Alì al è nassût un gnûf spazi culturâl creatîf, cul stes non di Cavallerizza, che al è stât screât cun doi dîs di fieste, E sarà la “cjase” de orchestre dai zovins Filarmonici Friulani, di SimulArte, de Corâl dal Friûl-Vignesie Julie, ma soredut di dutis lis personis che a varan voie di vivi e spartî chest spazi intune maniere gnove. I spazis a son progjetâts par dâ acet a ativitâts artistichis e musicâls, seminaris par dutis lis etâts, events publics, cors di formazion pai zovins, iniziativis dedicadis ae inclusion sociâl, mostris e ancje une sale pes provis. Il program al previôt almancul 40 events par cuasi 120 zornadis viertis ogni an. (A.I.) – 13.04.2026
Foto di A. Zorzin
