Ae ricercje di zovins gjornaliscj

Leali delle Notizie e presente vinars ai 13 al Palaç Municipâl di Roncjis di Monfalcon la seconde edizion dal “Premio Leali Young”inmaneât in memorie di Cristina Visintini, la vice presidente, muarte prin de ore. La associazion culturâl e ripropon il concors (informazions in rêt su:  www.lealidellenotizie.it) par zovins gjornaliscj aspirants jenfri i 18 e i 30 agns, di dute Italie, cul obietîf di stiçâ la ativitât e di promovi l’inseriment dai zovins inte profession: un desideri fuart de vice presidente. Ancje tal 2023, un comitât sientific di gjornaliscj formât a pueste al esaminarà i lavôrs presentâts dai partecipants. Il vincidôr al vignarà premiât tal dì de inaugurazion de 9e edizion dal Festival dal gjornalisim, a Roncjis dal 13 ai 18 di Jugn. (A.I.) – 10.01.2023