Mulins storics vierts in Friûl

A son 21 i mulins storics che si podaran visitâ in dut il Friûl domenie ai 19 di Mai, inte suaze des “Zornadis europeanis dai mulins” e de decime tierce edizion de rassegne taliane sui mulins storics inmaneade de AIAMS. Lis 21 realtâts visitabilis (vot dome in Cjargne) a son une espression uniche de operositât dai teritoris e custodis di savês antîcs de vite contadine, ancjemò vuê un impuartant e preseât presidi di cualitât e di tutele de tradizion. Mulinârs e responsabii des fabrichis a daran acet ai visitadôrs e di cualchi bande a son inmaneadis ativitâts colaterâls, propuestis in maniere direte dai gjestôrs. Ve la liste des realtâts viertis al public: il Mulin dal Flec e Vie di Mulin (Dieç), il Mulin Morassi (Dimponç), la Fabriche idrauliche di Val e il Mulin Antîc di Piedim (Darte), la See Veneziane ‘Sie di Toni da Fuce’ (Paluce), il Mulin Donada Baûs (Davâr), la See Veneziane (Aplis, Davâr) e il Mulin di Vile di Arbal (Sostâs, Prât), il Mulin da Fritule (Paulâr), il Mulin di Cjase Cocèl (Feagne), l’Antîc mulin Fradis Persello (Cjaurià di Colorêt di Montalban), il Mulin Nicli (Gjavons di Rivis Darcjan), il Mulin di Basandiele di Cjampfuarmit, il Mulin Coiutti (Godie), il Mulin Burello (Udin), il Mulin di Rivis di Sedean, il Mulin Braide (Flambri di Talmassons), il Mulin Vidal Dante (Bagnarie), il Mulin Miceu (Dael), il Vecjo Mulin di Polcenic e l’Antîc Mulin Pussini (Azide di S. Pieri dai Sclavons). (A.I.) – 17.05.2024