Une cubie residente a Cordenons e je stade fraudade îr di matine inte proprie abitazion di dôs personis che si jerin spaçadis par tecnic di une no miôr precisade societât idriche (al veve sù une gjachete narancine e un caschet) e par un operadôr de polizie locâl (vistît cu la monture relative).
Cul rimpin di un presumût vuast tecnic relatîf aes furniduris idrichis e dal gas tes abitazions dal cuartîr, i doi baradôrs a son rivâts a introdusisi inte abitazion e a convinci om e femine a meti in sigurece i bens preziôs par salvâju di un eventuâl fûc provocât di une fuide di gas. La cubie e à puartât varis anei, braçalets e golainis di aur (par un valôr al moment di no podê cuantificâ) e la sume in contants di 950 euros suntune taule al esterni de abitazion. I laris, dopo vê doprât un nebulizadôr al pevaroncin par neutralizâju, si son apropriâts di bens e bêçs e a son scjampâts. (A.D.G.) – 14.06.2023