Di lunis ai 9 di Zenâr e je jentrade in servizi la linie 14 “Circolâr centri storic” cun autobus eletrics. Un percors di cirche siet chilometris cuntun itinerari “fat cirint di sodisfâ lis esigjencis dai citadins”, al dîs il vicesindic Loris Michelini, che al è il risultât de sinergjie tra Comun di Udin, Regjon Friûl-Vignesie Julie e Arriva Udine.
I mieçs che a jentraran in servizi a son di ultime gjenerazion, dal dut eletrics, e a consumin mancul di un chilowatt par chilometri e si ricjariin tal zîr di 2 oris e mieze cirche. Lis corsis a saran ogni 15 minûts ducj i dîs di vore des 9 aes 20. I ponts fuarts a saran la acessibilitât ae aree pedonâl e ae Ztl e il passaç dongje di struturis scolastichis, di servizis publics e dai pôi de sanitât. E je di marcâ la intermodalitât cu lis liniis dal traspuart public locâl che a son za, di mût che cui che al rive o al vûl rivâ te perifarie al pues doprâ lis coincidencis.
“L’inviament de circolâr cun bus eletrics al è un pas grant par rindi la citât simpri plui verde, par che e deventedi, tai prossims agns, un model nazionâl e european te suaze de sostignibilitât ambientâl” al à concludût il vicesindic Michelini. (A.D.G.) – 10.01.2023
