Al è muart, intal ospedâl di Udin, Enzo Cainero. Al veve 78 agns. Fatâl il mâl che lu veve colpît intal mês di Otubar. Profont il corot esprès a ducj i nivei, di chel des istituzions a chel dal sport.
Nassût ai 23 di Avost dal 1944, il comercialist di Cjavalì al jere cognossût soredut pe lungje cariere tant che dirigjente sportîf e organizadôr di avigniments, a scomençâ des tapis dal Zîr di Italie in F-Vj, che a àn fat deventâ famôs a nivel mondiâl lûcs simbul dal nestri teritori.
Ae fin dai agns sessante Cainero al veve scomençât une cariere agonistiche intal balon che lu veve puartât fin in serie A, tant che portîr dal Varese. Al jere stât ancje dirigjent de Udinês e de Apu Udin. Intai agns doimil al jere stât il project manager des Universiadis di Tarvis 2003. Intal 2008 al veve decidût di candidâsi tant che sindic di Udin cul Centridiestre, ma al jere stât batût di Furio Honsell.
Tra cualchi mês, ai 27 di Mai, la caravane dal Zîr di Italie e tornarà a cjalcjâ lis stradis de nestre regjon, par lâ sù fin ae mont sante dal Lussari, enesim sium di Cainero che, magari cussì no, nol podarà viodi deventâ realtât, dopo il Çoncolan jentrât intal mît, il Plan dal Cjaval leât par simpri a Pantani, la lagune, il mâr, lis vals, fin il santuari di Madone di mont inte ultime edizion dal Zîr.
La notizie de sô muart e à dismovût corot profont. Ae femine Laura, ai fîs Andrea e Marco e a dute la famee lis condoleancis de redazion di Mediafriuli.
“Cainero nus lasse propit intal dì de sierade di Eyof. Ma chê flame e je tant che il messaç di vite e la ereditât di Enzo: a brusaran simpri e a vivaran intal cûr di ducj i sportîfs e di dutis lis personis che lu àn cognossût”, al à dit il governadôr dal Friûl-Vignesie Julie Massimiliano Fedriga.
“La muart di Enzo Cainero – al à zontât Fedriga – e sprive la nestre regjion di une figure di impuartance tant grande. Intal puartâ il corot gno personâl e de Aministrazion regjonâl ae famee, o viôt un vueit che vuê al aparìs incolmabil pes capacitâts, lis cognossincis, l’entusiasim, la gjenerositât iripetibilis di un om che al à fat grandis robis pal so teritori e la sô int”.
“O piert un amì che o ai condividût tantis bataiis e che insiemi cun chel, in graciis de sô fuarce, o vin rivât travuarts che a parevin impussibii” al à afermât il vicegovernadôr Riccardo Riccardi. (A.D.G.) – 28.01.2023
159
