Traviers de machine di ecelence ricognossude a nivel nazionâl e internazionâl de Protezion civîl dal Friûl-Vignesie Julie si fronte cun sveltece e eficience une altre operazion tant complesse e di coordenament inte emergjence: la racuelte di materiâi di dute Italie di destinâ, tant che aiûts umanitaris, ae Turchie fiscade dal taramot.
Al è, in struc, il concet esprès dal vicegovernadôr cun deleghe ae Protezion civîl dal Friûl-Vignesie Julie Riccardo Riccardi, che cheste matine al e à lât daûr des operazions di cjame dai containers sui camions de Pcr di Palme, mieçs che a son rivâts intal puart di Triest là che a son stâts cjariâts suntun traghet cun destinazion il puart turc di Mersin.
Par fâ front a cheste gnove emergjence, che par chê il Dipartiment nazionâl di Protezion civîl al à individuât il Friûl-Vignesie Julie tant che centri nazionâl pe distribuzion dai materiâi di inviâ aes popolazions de Turchie, midiant il puart di Triest e la Pcr, il vicegovernadôr al à firmât un decret che al previôt un impegn di spese di 600 mil euros par inmaneâ, in regjim di urgjence massime, dutis lis operazions necessariis ae spedizion dai aiûts umanitaris.
Il traspuart al è stât fat rivâ al puart di Triest par cure de Protezion civîl regjonâl su deleghe dal Dipartiment nazionâl. (A.D.G.) – 16.02.2023
