A lavoravin ancje in Friûl cierts membris di une associazion criminâl di origjin cinese che e furnive servizis finanziaris ilegâi ai citadins origjinaris de Republiche Popolâr Cinese residents o domiciliâts intal Nord Italie. Propit inte provincie di Udin, come in chês di Brescia, Bergamo, Milan, Cremone, Pistoia, Verone, Bolzan, Reggio Emilie e Prât, lis Flamis zalis di Brescia e dal Servizi Centrâl Investigazion Criminalitât a àn fat percuisizions viers di 31 citadins cinês, 21 di chei acusâts di auto ricicli e ricicli di bêçs transnazionâl. Il sodalizi al faseve une ativitât bancjarie abusive e al jere ramificât dilunc de penisule traviers di un sisteme a ‘hub’.
Il grup al ufrive ai conazionâi pardabon un “pachet di servizis” autorizât in gjenerâl dome ai istitûts di credit. No dome. La bande e ufrive ancje servizis di ricicli par altris associazions a delincui. Il sisteme al previodeve prin di dut la racuelte di bêçs tra i citadins intenzionâts a mandâ bêçs de Italie ae Cine cu la garanzie dal anonimât.
Eludint i sistemis di antiricicli, i bêçs e vignivin impleâts dopo par lâ incuintri aes esigjencis di monetizazion dal setôr des faturis falsis. Pai trasferiments no segnâts a jerin dopradis aplicazions informatichis critografadis e il sisteme “Fei Chen” su base fiduciarie. (a.d.g.) – 21.12.2023
