Trê vuidadôrs denunziâts par vuide sot de influence di droghis e sîs violazions aciertadis par vuide in stât di sturniment alcolic. Al è il risultât dai controi fats de Polizie stradâl di Udin inte serade di sabide ai 14 di Otubar ae jentrade de autostrade A23, dongje dal casel di Udin.
Pai controi al è stât doprât un laboratori in stât di aciertâ daurman la assunzion di droghis e, in graciis de presince di miedis, il stât di alterazion dal conducent. Dopo un prin control sul abûs di alcul, i conducents a son stâts invidâts a un prelêf salivâr, che al à il stes valôr biochimic dal sanc.
Intai licuits biologjics dai trê conducents denunziâts par vuide sot dal efiet di sostancis stupefacentis e je stade cjatade la presince di cocaine, canabinoits e altris droghis. (a.d.g.) – 23.10.23