Incident mortâl sul lavôr, inte matine sul tart di vuê, a Davâr. A pierdi la vite un om di 48 agns, resident a Glemone, che, ae vuide di un camion cun casson ribaltabil daûr, intal lâ jù la strade blancje di Mont Colzentîl, che e coleghe Mion a Casere Valinis, al à pierdût il control dal mieç e al è finît intal sdrup. Un svol di une cincuantine di metris, che i è stât fatâl.
Sul puest a son daurman rivâts i tecnics dal Socors Alpin e speleologjic, i militârs de Vuardie di Finance, lis Vuardiis dal fûc, i carabinîrs di Comelians e l’elisocors regjonâl. Cundut dai tentatîfs di rianimazion, il conducent dal mieç al à pierdût la vite pai traumis ripuartâts. Il cadavar, une volte recuperât, al è stât trasferît inte cele funebre dal cimitieri di Davâr a disposizion de autoritât judiziarie. (A.D.G.) – 22.05.2023
