Cjatât forsit il pirate de strade che al à tirât sot Fabrizio Copetti a Padue

Un om al è stât denunziât in relazion ae muart di Fabrizio Copetti, il bancjari furlan di 55 agns cjatât che al agonizave, inte sere sul tart di lunis ai 6 di Fevrâr, dongje di un passaç pedonâl, in vie Avanzo a Padue, e muart un pâr di oris dopo il so traspuart in ospedâl.

Al è un padoan di 58 agns, denunziât par omicidi stradâl e omission di socors. Il so auto al presente dams al veri denant. L’om al è stât individuât in graciis de analisi des telecjamaris di videocontrol. Su la muse di Copetti al jere presint un traume fuart e, tra lis ipotesis dal decès, e jere saltade fûr daurman chê dal invistiment de bande di un auto pirate. (A.D.G.) – 08.02.2023