Moments di pôre cheste gnot a Marian dal Friûl par cuatri fantats di Cormons. E jere la une di gnot plui o mancul cuant che, su la strade regjonâl che di Gardiscje e mene a Cormons, pôc prime di un distributôr di benzine, al è saltat fûr de vegjetazion un cenglâr: il vuidadôr nol à rivât a evitâ l’animâl. Pôcs seconts e l’auto al à cjapât fûc: i cuatri zovins a son rivâts ducj a saltâ fûr in timp de veture cence dam. Sul puest ambulance, Carabinîrs di Gardiscje e lis Vuardiis dal fûc, che a àn studât il fûc. Il probleme dai incidents stradâi, causâts dal passaç improvîs di animâi salvadis, al è sintût in zone: un pâr di agns indaûr, a pocje distance, al jere sucedût un fat simil. Intal ultin mês in regjon a son stâts almancul cuatri i incidents cun animâi salvadis cjapâts sot. (A.D.G.) – 05.07.2023
Auto prin cuintri un cenglâr e dopo in flamis
65