Plui di 85 mil i alpins che a àn sfilât a Udin pe nonantesime cuarte Adunade nazionâl de Associazion Nazionâl Alpins.
A son stadis cuasi undis oris di sfilade sot de ploie, che dome dopomisdì e à dât une tregue aes Penis Neris e ai miârs di personis che a àn jemplât il centri di Udin.
La sfilade si è concludude cu la cerimonie rituâl dal “Passaç de steche” tra il president de Sezion Ana di Udin, Dante Soravito de Franceschi, e il president de Sezion di Vicence “Mont Pasubio”, Lino Marchiori, che al organizarà intal 2024 la edizion numar 95 de manifestazion. I doi presidents a jerin acompagnâts dai sindics rispetîfs, Alberto Felice De Toni di Udin e Francesco Rucco di Vicence.
“Al è stât un impegn impuartant, ancje parcè che la pandemie e à fat slitâ dut in indenant – al à dit Soravito de Franceschi -, ma o vin podût contâ no dome sul impegn di centenârs di volontaris alpins, ma ancje su la grande colaborazion dal Comun, de Regjon, dai servizis di traspuart public e des Fuarcis dal ordin. E, cundut dal timp inclement, dut si è fat cence problemis particolârs, tra l’afiet de int”.
Il president de Ana, Sebastiano Favero, al à comentât cun grande sodisfazion il risultât de Adunade di Udin: “O sin tornâts – al à dit – in maniere fortunade ai nivei pre-Covid; e jere tante voie di normalitât e di condivision cu la int, condivision che a Udin, tiere di alpins par elezion, e je stade pardabon palpabile. I alpins a continuaran cun simpri plui grande assiduitât inte opare di coinvolziment dai zovins, sedi traviers i Cjamps scuele, sedi domandant al Guvier che i nestris fantats a puedin jessi cjapâts inte risierve istituende des Fuarcis Armadis ancje in colaborazion cu la Ana: parcè che i zovins, se cjapâts in maniere oportune e devant di esemplis positîfs, a san ancjemò rispuindi presint e a partecipin cun entusiasim”. (A.D.G.) – 15.05.2023
