Plui o mancul 400 operadôrs in plui tra polizie e esercit, un control a tapêt sui pas principâi e sui secondaris, ma nissun impediment fisic ae libare circolazion des personis.
Tacant di sabide il Guvier talian al à disponût la sierade dai confins tra Italie e Slovenie, 232 chilometris, cuntune atenzion particolâr inte aree di Triest e di Gurize di simpri puarte di jentrade principâl dai migrants de Rote balcaniche. Il Guvier al à fat savê che e je une decision cjapade su la base des indicazions dal antiterorisim che al à evidenziât il pericul che teroriscj a doprin propit la Rote balcaniche par infiltrâsi in Europe.
Decisions compagnis a saran cjapadis ancje de Slovenie. I detais de metodologjie dal intervent a vignaran definîts intune riunion programade vinars aes 7 sore sere inte prefeture di Triest, ma lis indicazions a son claris: nissun nol jentre in Italie cence un control cussienziôs dal mieç e dai documents. (a.d.g.) – 19.10.23
