Tante pôre cheste matine intune palacine di Udin dulà che, pôc prime des 11, lis Vuardiis dal Fûc di Udin a son intervignudis par un fûc che si è disvilupât intun apartament dal prin dai cuatri plans dal edifici al numar 24 di vie Bariglaria, componût di 39 nuclis abitatîfs. Lis Vuardiis dal Fûc a son rivadis cun 3 scuadris, 2 autobotis, 2 autoscjalis, il funzionari di vuardie e il “cjar aiar”. A pene rivâts sul puest, doprant la autoscjale, a son rivadis al lozament interessât dal fûc, a àn verificât che dentri nol fos nissun e a àn scomençât lis operazions di distudament. Intal stes timp, doprant une seconde autoscjale, a àn proviodût a meti in salf 4 personis e un cjanut di altris apartaments al prin, al secont e al tierç plan dal stabil. Trê des personis salvadis a son stadis visitadis dal personâl sanitari che al à decidût di acompagnâlis al pront socors par controi: doi di lôr a vevin inalât il fum, une tierce e à acusât une crisi epiletiche.
Al moment a van indenant lis operazions di bonifiche dal fûc e la metude in sigurece. Lis investigazions a son daûr a cirî di scuvierzi lis causis. Sul puest ancje la Polizie Locâl. (A.D.G.) – 29.06.2023
