In pôc mancul di 48 oris a son stâts tirâts sù 17 mil euros a poie de famee di Damiano Iob, l’imprenditôr agricul muart joibe passade inte campagne di Tarcint, dopo jessi stât becât di un inset.
Iob al jere cognossût tant in Friûl, in particolâr pe sô produzion di prodots biologjics. La comunitât, savoltade pe sparizion dramatiche, e à partecipât convinçude ae racuelte fonts inviade sul portâl GoFundMe cul obietîf di dâ un contribût economic concret ae compagne Tatiana e al piçul Edoardo. Lis jentradis principâls de famee, di fat, a jerin leadis ae ativitât imprenditoriâl di Damiano, impegnât intai ultins mês ancje intal finî cierts lavôrs impuartants di manutenzion inte abitazion di residence. Comovent un passaç de letare che e acompagne la racuelte fonts: “Ti riviodarìn intai voi di Edoardo che al cressarà savint di vê vût il miôr pari che si podès desiderâ. Parcè che tu tu jeris simpri presint par lui e la cjançon che tu i cjantavis ogni sere e sunarà ancjemò intai siei siums”. (A.D.G.) – 26.06.2023