Lunis ai 9 di Zenâr e sarà riativade la funzion di Rsa intal ospedâl di Palme: la struture si cjatarà intai locâi za doprâts par cheste funzion, inte aree tacade aes degjencis de struture di Medisine, cuntune capacitât massime, pal moment, di 20 puescj jet.
I acès a chescj puescj jet a saran gjestîts dal Pont unic di acès dal Distret dal Agri Aquileiês, indulà che a puedin za jessi presentadis eventuâls segnalazions di cjapade in cjame.
La direzion de struture e je in cjâf al Distret (diretôr Marco Scarbolo) intant che la gjestion cliniche e sarà rimetude a Paola Dalla Montà e la gjestion assistenziâl ae Coordenadore Infermieristiche a Paola Michelin.
La funzion di Rsa e jere stade sospindude dopo des misuris di riorganizazion dal ospedâl di Palme dovudis ae Pandemie. La gnove viertidure e je un obietîf volût di Asufc dal moment che la popolazion di riferiment dal Distret e je numerose e la funzion de Rsa e je impuartant par garantî ai pazients plui fragjii percors di recupar funzionâl. (A.D.G.) – 5.01.2023
E torne a vierzi la Rsa tal ospedâl di Palme
142
