Dut pront pe Vie Crucis a Claut

La celebrazion de Vie Crucis a Claut e à un impat senografic e musicâl che pôcs altris paîs dal teritori a puedin svantâ. Ancje chest an nol sarà di mancul, cui famôs “Batatocs” ancjemò une volte protagoniscj par costruî la atmosfere de Passion di Crist. A celebrâ la sacre rapresentazion, Vinars sant aes 8 di sere, al sarà il vescul di Concuardie-Pordenon, bonsignôr Giuseppe Pellegrini. Dopo la pandemie, che par doi agns e veve fat sospindi tancj dai rituâi paisans, la Parochie di Claut e je tornade a scomençâ, dal an passât, a proponi il so apontament tradizionâl: la rapresentazion religjose, che si disvoluce traviers lis viis dal paîs, compagnade dal sun prodot di curiôs struments musicâi di len, a rapresentâ in maniere simboliche il davoi che al à acompagnât Jesù ae crucifission. (A.I.) – 05.04.2023