Dai distributôrs automatics 11 milions di toneladis di mangjativis donadis in F-Vj

da Alessandro Di Giusto

Intal 2023 l’acuardi tra Confida, Associazione italiana distribuzione automatica, e Fondazione Banco Alimentare Onlus al è deventât operatîf a plen e al à permetût di tirâ sù e donâ in Italie ben 74 toneladis di mangjativis. Il Friûl-Vignesie Julie cun 11 toneladis al è tra lis regjons che a àn donât di plui insiemi a Sicilie (cuasi 21 toneladis), Emilie-Romagne (plui o mancul 18 toneladis) e Piemont (14 toneladis). La plui part dai prodots a son aghe e bevandis, aliments sedi frescs sedi secs, pagnuts e afins, prodots di for, mirindutis. La percentuâl otime di recupar di prodots frescs – come pomis, verdure, plats pronts, prodots a base di formadi, mirindis di frigo, tramezins – al evidenzie la sinergjie impuartante tra gjestôrs dai distributôrs automatics e Banc Alimentâr. Di fat, in graciis dal control costant dai gjestôrs che a ritirin i prodots dai distributôrs automatics cun anticip a pet de date di scjadince e de velocitât dal Banc Alimentâr inte distribuzion dai prodots aes organizazions sul teritori, si è podût evitâ la straçarie alimentâr e judâ tantis fameis e personis in dificoltât.

Pe gjestion operative di chest progjet, lis 11 delegazions teritoriâls Confida a àn colaborât in maniere direte cui 21 Bancs Alimentârs regjonâi, che a curin la ridistribuzion a cui che al à bisugne. (a.d.g.) – 13.02.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui