Il cost di lûs e gas de pissine al met in dificoltât il belanç comunâl e il sindic di Tumieç, Roberto Vicentini, al fâs un apel ai Comuns de Cjargne pe gjestion condividude de struture e la compartecipazion aes spesis.
“Intal 2022, tra energjie eletriche e gas, il Comun al à vût boletis par 195 mil euros. Al va dopo zontât il corispetîf (36 mil euros) paiât ae societât che e gjestìs l’implant cemût che al è previodût dal apalt dât a titul sperimentâl intal 2021 cun durade bienâl” al sclarìs Vicentini.
Pes stessis boletis, la spese storiche sostignude des gjestions precedentis e jere tra i 70 e i 80 mil euros cun nissune cjame pe aministrazion comunâl. “La situazion di cumò e je tant diferente – al ricuarde il sindic -: lis spesis a son cuasi triplicâts e a colin dal dut sul Comun di Tumieç; la sielte e à permetût sì di fâ ripartî la struture e di furnî un servizi fasint però colâ sul nestri belanç ducj i coscj di un implant di rilevance comprensoriâl. Propit parcè che la utence de struture e rive di dute la Cjargne – al sosten – i coscj a varessin di jessi ripartîts tra ducj i Comuns”. (A.D.G.) – 16.02.2023