Atletiche: il trofeu “Benedetti” dentri dal “Memorial Todaro”

Vinars ai 25 di Avrîl a Udin al torne il “Memorial Todaro”, un dai apontaments di ponte dal calendari de atletiche lizere furlane rivât ae cuarantesime seconde edizion. Tal cjamp di atletiche “Dal Dan” di Padier a sarà une schirie di garis di nivel cetant alt pal event inmaneât come simpri cun passion de Atletica Malignani Libertas Udine, intitulât ae memorie di un zovin atlete furlan, muart masse adore. Il Memorial Todaro al scree la stagjon des garis su piste tal viert e chest an, vinars ai 25 e domenie ai 27, e je ancje la novitât dal trofeu “Gianpietro Benedetti”, dedicât ae specialitât dai 800 metris. Un dai ospits straordenaris al è il campion bosgnac Amel Tuka, medaie di bronç ai Zûcs olimpics di Pecino tal 2015 e di arint a Doha tal 2019, ma in gare al rivarà ancje la gnove stele taliane Francesco Pernici, e cetancj altris nons. (A.I.) – 23.04.2025