27
Un album di fotografiis e je une machine dal timp, ogni fotografie une storie, ogni storie un barcon viert bande un inaltrò. La compagnie Kepler-452 e racuei intun album senic cence confins lis contis e lis imagjins di personis e di comunitâts saltadis fûr di varis lûcs de Italie e de Europe. Il spetacul “Album” di Enrico Baraldi, Riccardo Tabilio e Nicola Borghesi, interpretât di chest ultin, si misure cu la memorie e cul so smamî: fisiologjic, materiâl o sociâl. Doprant lis proiezions in direte, imagjins e contis, il public al è imerzût intune riflession su ce che al reste e ce che al sparìs: di joibe ai 10 fint a sabide ai 12 tal “Palamostre” di Udin pe stagjon di Teatri “Contatto”. (A.I.) – 09.04.2025
