Un mestri di ghitare tal Palamostre

“Note Nuove”, la rassegne inmaneade di Euritmica sot la direzion artistiche di Giancarlo Velliscig, e vierç il gnûf an joibe ai 5 tal Teatri “Palamostre” di Udin cul conciert – une vore spietât dal public di passionâts – di Tommy Emmanuel, il ghitarist australian di liende, che tal mês passât al à scomençât il so gnûf tour tai teatris plui impuartants de Italie. Cognossût pe sô ecezionâl tecniche di “fingerstyle”, e pe sô capacitât di mudâ ogni spetacul intune esperience une vore speciâl, Tommy Emmanuel al sunarà tal “Palamostre” di Udin. Prime di lui, a tacâ des 8 sot sere, il ghitarist e compositôr roman Alberto Lombardi. La schirie di concierts e va indevant ai 24 di Fevrâr simpri al Palamostre cun “Around Miles & Trane”, il gnûf progjet dal baterist Roberto Gatto che al celebre il centenâr des nassitis di Miles Davis e John Coltrane, e cun altris datis tai mês di Març e di Avrîl. (A.I.) – 04.02.2026