Un cors par capî la comedie al cine e par television

Ce vuelial dî cun precision cuant che si fevele di comedie? Cuâl ise la diference jenfri une comedie e un cine comic? Cuâl isal il stât atuâl di chê che e jere la “comedie taliane”? Chestis e cetantis altris domandis a varan rispuestis tal gnûf cors anuâl de Mediateche “Mario Quargnolo” a Udin, che si fâs li dal Visionario dai 2 di Fevrâr ai 5 di Març. “Nissun al è perfet – Ducj i colôrs de comedie, dal cine ae television” e je une imersion complete intai mecanisims complès de ridade e dal bonspirt, dispès dismenteâts. Il cors al è struturât in cinc lezions, cuatri cines e un laboratori. Lis lezions, che si tegnin ogni joibe, a saran vuidadis di Enrico Maso, Steven Stergar, Giorgio Placereani, Alberto Crespi e Ilaria Feole. Sul schermi grant dal Visionario e sarà la pussibilitât di viodi cuatri oparis mestris dal cine tes lôr versions origjinâls cun sottitui: “Annie Hall” di Woody Allen, “A qualcuno piace caldo” di Billy Wilder, “Divorzio all’italiana” di Pietro Germi e “Hot Fuzz” di Edgar Wright. (A.I.) – 31.01.2026