Un cine sul Friûl tai dîs de Liberazion

L’otantesim aniversari de Liberazion dai 25 di Avrîl si celebre a Udin cuntun event cinematografic di grant valôr storic e culturâl; la prime proiezion dal cine “La croce di ferro” (La crôs di fier), che si fasarà miercus ai 23 tal cine dal Città Fiera aes 8.30 sot sere. La pelicule, fate cuntun lavôr trê agns e un progjet indipendent, e je nassude de colaborazion dai senegjatôrs Emiliano Grisostolo, Massimo Bocus e Luca Bertossi, che al è ancje il regjist. Il cine al va indaûr tal 1944, tal cûr de Seconde vuere mondiâl, intun Friûl segnât de ocupazion dai naziscj e de lote pe libertât. Lis ripresis, tacadis za tal 2022, a son stadis fatis te zone di Tarvis (Fusinis e Valbrune), tes culinis di Feagne, tal borc di Andreis e dongje di Manià, il paîs di Grisostolo. I lûcs, sielts pe bielece e pal leam cui events storics, a judin a pandi une atmosfere vere che e tire dentri il spetatôr. La storie e tache tai dîs dal armistizi, ai 8 di Setembar dal 1943 e si davuelç intun toc de Italie, il Friûl, che al jere controlât dai militârs todescs. Il risultât al è stât pussibil – stant i pôcs bêçs a disposizion – in graciis de passion e dal impegn.