L’Orcolat cheste volte al rive fint a Triest

Il cincuantesim aniversari dal taramot al côr svelt, si che duncje i ultins mês dal an a viodin une schirie di spetacui dedicâts ae tragjedie dal Mai – e Setembar – dal 1976 tai teatris de regjon. No dome in Friûl, ma fintremai a Triest, là che e rive la repliche di un spetacul che al à za cualchi an. Par dîle dute, a son za dîs agns di cuant che Simone Cristicchi al veve scrit cun Simone Orlando “Orcolat ’76”, un spetacul dal festival “Folkest” pal cuarantesim dal taramot e presentât pe prime volte a Glemone. Tal stes domo, chel spetacul al è tornât il mês passât par memoreâ il ’76, daspò che la Regjon F-Vj e veve za decidût di puartâlu ai furlans in Americhe, te capital Washington. Lis gnovis datis dal spetacul che al viôt dongje dal cjantant atôr roman la FVG Orchestra e la Corâl dal F-Vj diretis di Valter Sivilotti, cui intervents di Anna Maria De Monte e Francesca, a tachin martars ai 20 a Tisane, e po dopo a passin par Sacîl, Manià, Grau e Dartigne pal circuit dal ERT, prime di sierà domenie ai 25 tal “Rossetti” di Triest. (A.I.) – 19.10.2026