La storie dal jazz par cuatri setemanis

La associazion culturâl Euritmica di Udin e la Universitât “delle LiberEtà” dal F-Vj a tornin a impegnâsi adun par un progjet comun: tal mês di Otubar, la sale cunvignis de LiberEtà, in vie Caltanissetta 35 a Udin, e darà acet ae rassegne “Autumn leaves”, cun cuatri apontaments a ingrès libar sore nuie dedicâts ae musiche jazz, cemût che e je nassude e cemût che e va indevant. A screâ la rassegne sabide ai 4 aes 6 di dopomisdì al sarà il pianist Claudio Cojaniz, che al tornarà aes lidrîs dal jazz. La setemane dopo, un altri preseât pianist furlan, Mauro Costantini, e ai 18 di Otubar il duet di ghitare e vôs formât de cubie (artistiche e te vite) Michele Pirona e Marina Bargone. A sierâ la rassegne, ai 25 di Otubar, il piano e la vôs de zovine autore furlane Michela Franceschina. (A.I.) – 30.09.2025