La rassegne dai cines di mont de SAF

E torne a tacâ vinars ai 7 di Fevrâr la Rassegne dal cine e dai protagoniscj de mont de SAF-Societât Alpine Furlane e dal Dopolavôr Feroviari di Udin, rivade ae cuarantesime edizion. In dut, a saran cinc seradis a jentrade gratuite, lis primis cuatri tal Auditorium “Elio Venier” di Pasian di Prât e il grant finâl ai 15 di Març tal Teatri “Palamostre” di Udin cul alpinist Hans Kammerlander, che al à fat fintremai 2.500 scjaladis in dutis lis bandis dal mont, protagonist de serade dedicade al K2, la “mont des monts”. Il prin apontament al sarà cul documentari “Alpina 150”: un viaç inte storie, une cjalade al avignî su la storie de SAF cu lis intervistis ai protagoniscj dal alpinisim furlan. (A.I.) – 06.02.2025