La ‘cubie strambe’ dai agns Sessante al dì di vuê

Une des cubiis plui compenetradis dal teatri talian, chê fate di Gianluca Guidi e Giampiero Ingrassia, e sarà ospitade dal Circuit dal ERT cu “La strana coppia” (La cubie strambe), un classic american firmât di Neil Simon. La comedie e sarà martars ai 28 tal Teatri “Modena” di Palme, miercus ai 29 tal Teatri “Zancanaro” di Sacîl, joibe ai 30 di Zenâr tal “Candoni” di Tumieç. Rapresentât pe prime volte a Broadway intal 1965, al è un esempli di cemût che Neil Simon, un dai autôrs gjeniâi plui prolifics dal teatri comic de seconde metât dal Nûfcent, al rivedi a cjatâ simpri une piçade di matetât simpatiche inte vite di ogni dì. La comedie, che e manten in cheste edizion taliane la ambientazion inte New York de fin dai agns Sessante, e conte la dificile e complicade convivence tra doi amîs cun dôs personalitâts oponudis in maniere diametrâl. (A.I.) – 27.01.2025