Il conservatori di Udin viert al public par un dì

Il “Tomadini Open Day”, la grande fieste de musiche par une zornade plene di notis, al torne a Udin domenie ai 11 tal conservatori citadin, viert al public pe ocasion, cuntun program fat di ben 44 concierts des 10 di buinore fint aes 7 sot sere. Pai passionâts e curiôs a saran a disposizion 120 oris di lezion a rapresentâ i passe 90 cors dal an academic dal conservatori. Si tache tal zardin cul conciert de Big Band dal “Tomadini” direte di Glauco Venier, po dopo a sarà un conciert ogni cuart di ore intes variis salis. Des 11 di buinore e sarà vierte al public ancje la farie di struments a cuarde. Par sierà, conciert dal Ensemble pop-rock diret dai docents Valter Sivilotti e Giuseppe Saracini. (A.I.) – 10.05.2025