“Giovanni da Udine”: fieste pai prins 25 agns

Ai 18 di Otubar dal 1997 al vignì screât il Teatri Gnûf ‘Giovanni da Udine’ cu la Otave sinfonie di Gustav Mahler. Di alore, 25 agns di emozions, miârs di avigniments di ogni gjenar par passe un milion e mieç di spetatôrs, cuasi trê contant ancje i events colaterâi. Inte sale di 1200 puescj, il “Giovanni da Udine” al celebrarà lis “gnocis di arint” cu la citât joibe ai 20, cu la presentazion dal libri di Paolo Patui e Francesca Tamburlini “Il Teatro e la sua città”: no dome une liste, ma une narazion a plui vôs che e va indaûr fin ae tradizion di Udin che intal ‘800 e jere ‘la citât dai teatris’ . Vinars ai 21, la prime stagjonâl cu la Orchestra Sinfonica Nazionale della Rai e il Coro del Teatro Regio di Turin direts di Fabio Luisi par presentâ ancjemò une volte Mahler. (A.I.) – 19.10.2022