Il compositôr e pianist di Pordenon, Remo Anzovino, al è l’autôr de colone sonore dal documentari “150 anni di Corriere della Sera. Il racconto dell’Italia” (I 150 agns dal Corriere della Sera. La storie de Italie), che al conte la storie dal gjornâl plui impuartant de Italie. Un viaç vuidât di Neri Marcorè, là che il ‘Corriere’ al à un rûl impuartant te vite sociâl, politiche e culturâl dal paîs. La musiche, jessude su dutis lis plateformis digjitâls e distribuide di Universal Music Italia su la etichete Decca Italy, e scomence cuntun teme principâl, “Strillone”, che al vierç e al siere il cine e al segne il passâ dal timp, intune partidure che e messede la musiche sinfoniche e chê di cjamare cu la musiche eletroniche. “Scrivi la colone sonore di chest progjet – al dîs Remo, un dai compositôrs e pianiscj plui origjinai su la sene contemporanie – mi à permetût di tornâ a passâ 150 agns de storie dal nestri paîs midiant de storie dal so gjornâl plui impuartant”. (A.I.) – 09.03.2026
Foto di P. Grasso
