AlienAzioni, al è il moment di un spetacul su lis sûrs Bertè

Dopo il sucès de viertidure cun Luce Caponegro, di ducj cognossude tant che Selen, protagoniste li dal cine Kinemax di une cunvigne dal titul “La gnove vite di une ex pornostar”, la seste edizion dal festival AlienAzioni a Gurize e va indevant cuntun altri apontament intal stes lûc. Al è in program martars ai 31, aes 8.45 sore sere, e al à par titul “Mia Martini & Loredana Bertè: la voce dell’anima”. Il spetacul al vûl jessi un viaç inte vite di dôs grandis feminis e artistis, che a fasin part de storie de musiche taliane, che a àn cjantât se stessis e lis feminis cence vêi, cence filtris. Il spetacul al ripasse i agns dal lôr sucès e chei dopo, in graciis de atore Michela Cembran e dal test di Annamaria Persichella. (A.I.) – 30.10.2023