A Sacîl la dediche in musiche e peraulis a Stefano Benni

Cualchi dì indaûr al è muart il scritôr Stefano Benni, lassant un vueit che al somee impussibil di jemplâ. Propit par chest il spetacul za in program par domenie ai 14 te suaze dal festival “Jazz River”, al à un significât gnûf e profont: di apontament artistic al devente l’omaç a un dai autôrs plui visionaris dal nestri timp. La sô ironie e la sô capacitât di contâ lis ombris e lis maraveis dal nestri Paîs a tornaran a vivi a Sacîl, te tignude Vistorta, là che aes 11 di buinore e larà in sene “Frattaglie Itagliane. Le animelle di Stefano Benni”. Un spetacul diret e interpretât di Sonia Barbadoro e Lorenzo Acquaviva, che al instrece leterature, teatri e musiche intun viaç fat di personaçs stramps, cu la musiche dal tercet furlan Lune Troublante – Matteo Sgobino, Alessandro Turchet e Didier Ortolan. (A.I.) – 12.09.2025