Sabide ai 8 al varès fat 87 agns. Invezit, tal ospedâl di Gurize si è distudade la vôs plui innomenade de television pai passionâts di sports: chê di Bruno Pizzul, che di agnorums al jere tornât a stâ tal so paîs, Cormons. Nassût tal ’38, jentrât te Rai tal ’69, dal 1986 al 2002 al è stât la vôs uficiâl de Nazionâl di balon taliane, contant lis vitoriis ma ancje lis delusions (soredut chês dal Mondiâl dal ’90 e di chel dal ’94). La sô ultime croniche e fo propit in regjon, a Triest, par une partide di cualificazion Italie-Slovenie, ma vie pai agns al à simpri fat il comentadôr, ancje tai programs di sport di Telefriuli. Al è stât un dai prins a puartâ la lenghe furlane sul piçul schermi e, soredut, a rapresentâ un model par chês tieris furlanis che lu preseavin e che lui al à simpri amât. La sô vôs, che no si podeve confondi, e à contât simpri cun elegance e buinegracie un mont dal balon che al è daûr a sparî, e ancje par chest a son rivâts messaçs di ogni bande: de politiche, des scuadris di balon, di cui che lu à cognossût ancje dome cuntune strente de man e un “mandi”. Mandi Bruno. (A.I.) – 05.03.2025
45
