Al è corot fuart in dut il Friûl pe muart di Pape Francesc. Îr di sere aes 7, tal Domo di Udin, l’arcivescul Bonsignôr Lamba al à celebrât la messe in sufragji di Bergoglio, muart te buinore de stesse zornade par vie di un ictus. “La gnove che Pape Francesc al jere muart – al à dit Lamba inte so omelie – mi è rivade intant che o jeri te preson di Tumieç par dî messe. Di la de comozion o ai pensât che il Signôr al à dât al Pape almancul la pussibilitât di celebrâ la Pasche tal an dal Jubileu … Al è un messaç che Pape Francesc nus à lassât: nus à incoragjât a jessi missionaris tal puest indulà che si cjatin. Intes fameis, tai lûcs di lavôr, intes scuelis e ancje tai lûcs di divertiment. Par dut indulà che al covente – al à visât il vescul – il coraç di anunziâ il Vanzeli, prime di dut cu la vite e dopo, come che al diseve S. Francesc, che il Pape al veve cjapât il so non, ancje cu lis Peraulis”.
La glesie di Udin si strenç in preiere e prime dai funerâi che a saran sabide ai 26 di Avrîl in place San Pietro a Rome, a saran cetantis lis iniziativis. Joibe ai 24 di Avrîl aes sîs e mieze sore sere bonsignôr Lamba al clamarà dongje i zovins tal domo par preâ par Pape Francesc.
“Pape Francesc al è stât – al à dit Massimiliano Fedriga, president dal Friûl Vignesie Julie un che al cjalave dentri de comunitât e al è rivât a pandi un messaç straordenari ae int stant simpri dongje des personis. Al è stât simpri un om viert al dialic ancje se al à simpri dite ce che al pensave cun scletece”.
A son cetancj i messaçs di corot rivâts di une vore di esponents politics dal Friûl Vignesie Julie cence diference di colôr. (a.d.g.) – 22.04.2025
