La procure di Udin e à domandât la misure cautelâr dai arescj domiciliârs par Marco Chiopris, 45 agns di Buie, e Jan Gavino Pozzobon, 49 agns resident a Feltre, blocats martars di sere dilunc dai scuintris in place Primo Maggio ae fin dal corteu a pro de Palestine. Vuê di matine e je stade tal tribunâl di Udin la udience di convalide dal arest dai doi oms denant dal judiç pes indagjins preliminârs Maria Rosa Persico.
L’avocat difensôr dai doi arestats, Paolo Viola, al à domandât misuris mancul griviis, ven a stai la improibizion di dimore a Udin. Chiopris e Pozzobon a son acusâts di violence e resistence a public uficiâl continuade e ingriviade dal fat di vê la muse platade e dal fat di jessi stade fate di plui personis adun. Tal particolâr, Chiopris, che al à un precedent lizêr, al è acusat di vê tirat claps e altris ogjets cuintri des fuarcis dal ordin. Pozzobon invezit al è acusât di ve cirût di fermâ i mieçs de Polizie dant cuintri cu la stangje di une bandiere.
La decision dal Gip e je spietade tal dopomisdì di vuê. (a.d.g.) – 17.10.2025
