La Vuardie di finance di Pordenon e à metût la peraule fin al spaç di droghe, soredut marihuana e cocaine che al lave indenant di un an tal Friûl ocidentâl e ancje in provincie di Vignesie.
A colâ inte rêt tirade dai financîrs di Pordenon une cubie che e jere a vivi a Pasian di Pordenon. Lui, di origjin albanese, al è stât puartât in preson intant che je, di origjin ucraine e scuen sta sierade in cjase. Par ducj e doi la acuse di spaç di droghe.
Lis investigazions a jerin tacadis daspò di un control fat a Çopule, cuant che un om al jere stât cjapât cun cocaine inte sachete. Di che volte a àn rivât a scuvierzi il sisteme metût in pins dai doi, rivant fintremai tal Venit cuntune schirie di percuisizions. Passe 900 i grams di cocaine e mariuane secuestrade adun cun 12 mil euros in contants e ancje une pistole non denunziade. (a.d.g.) – 23.04.2026
