Cuatri minôrs di etât a son stâts denunziâts ae Procure pai minôrs di Triest par lesions ingriviadis e violence privade.
Joibe ai 8 di Mai a Pordenon, in vie Generale Cantore, un grup di frutats si jere metût a tirâ claps, forsit par parâ vie la stufe, cuintri des cjasis dant fastidi ai residents. Une siore di 62 agns e je jessude par cridâju e propit in chel moment e à cjapat un clap dret sul pît, fat che i à provocât crevaduris che a vuariran in 30 dîs.
Sul puest a son rivâts i carabinîrs dal grup radiomobile, ma i zovins a jerin za scjampâts. Pôc dopo e je rivade une altre segnalazion inte zone Torre e i cuatri a son stâts individuats cun lis musis cuviertis dai capuçs des felpis e a son stâts blocâts. Cierts testemonis ju àn ricognossûts tant che i autôrs de clapadorie une volte puartâts inte caserme. Pai cuatri minôrs di etât e je cussì partide la denunzie ae Procure dai minôrs di Triest. Cumò al sarà il Public ministeri a valutâ cualis che a podaressin jessi lis ipotesis di reât. (a.d.g.) – 12.05.2025
