Arestât un comerciant di cannabis light dal Friûl Ocidentâl che al vendeve ancje cocaine

Arestât de Vuardie di finance il titulâr di une buteghe di cannabis light vierte inte zone di Pordenon. Lis investigazions a àn scuviert di fat che al spaçave cocaine e spagnolets eletronics che a contegnin Thc, di là di vendi marihuana e hashish di divignince dubie.
Lis investigazions a son scomençadis dopo che la buteghe e jere stade segnalade come lûc pussibil dal spaç di sostancis ilegâls inte aree dal Friûl Ocidentâl: i oms dal Nucleo Mobile e a àn documentât un scambi di marcjanzie tra il titulâr de buteghe e un client, pôc dopo fermât par un control a pocje distance cun intor un gram di cocaine e une confezion di “DABWOODS Hybrid”, un spagnolet eletronic par fumâ un licuit che al à un valôr di Thc prossim al 90%, cuistâts intal locâl paiant 180 euros. La percuisizion dopo inte buteghe e à permetût di cjatâ 3 grams di cocaine, 20 confezions dal spagnolet eletronic e altri materiâl, cjapâts dentri plui di 10 chilos di marihuana e 1,15 chilos di hashish, cence che al fos pussibil dimostrâ la divignince lecite. (a.d.g.) – 27.02.2024