La balotazion pes elezions comunâls di Udin e je stade vinçude di Alberto Felice De Toni, che al à otignût une percentuâl di vôts che e je pôc sot dal 53%. Ancje se no je ancjemò la proclamazion uficiâl, inte sede eletorâl di De Toni si è daûr a celebrâ, ancje parcè il scart di vôts (52,64% par Di Toni e 47,36% par Fontanini) al pâr dificil di podê jemplâ mancjant ae clamade il risultât di 6 seçs pôc dopo lis cuatri e mieze dal dopomisdì.
Il centriçampe al torne cussì al guvier de citât dopo la parentesi di Pietro Fontanini e ancjemò une volte la citât si rimet a un ex retôr de Universitât, cemût che al è sucedût cun Honsell. “Udin e à sielt di cambiâ – al à dit De Toni -. Prime di cualsisedi altri coment, no pues che graciâ fin di cumò i citadins e lis citadinis che a àn volût dâ fiducie al nestri progjet civic. Un risultât che al premie dutis lis fadiis che i nestris candidâts e lis nestris candidadis a àn impleât par contâ la Udin che o volìn. Une Udin plui biele, vive, trative. Intune peraule: plui contente”. De Toni al à fat dopo un “ringraciament sintût al sindic che al va fûr, Pietro Fontanini. Al è stât un aversari fuart e leâl che o ai preseât il so compuartament in campagne eletorâl simpri coret e rivuardôs des diviersis posizions. O speri che a sedin lis cundizions par lavorâ cumò in Consei comunâl in mût costrutîf pal ben de citât”. (A.D.G.) – 17.04.2023
