Soliscj ma unîts di vincjecinc agns

Meti adun tancj soliscj e fâju sunâ insiemi. Intun setôr individualist come chel dai ristorants, meti in pîts un grup che ju tignedi dongje al è za un sucès, se dopo chest al va indenant par 25 agns al è pardabon un miracul. E alore chel che al taie chest an il Consorzi “Via dei Sapori” al merete di jessi festezât. Dut al nas tal 2000 cun puar Aldo Morasutti, de tratorie “Da Toni” di Gridiscjute, che al sburte par fâ alc intun moment di flape pal mont furlan dal mangjâ e dal bevi. A son lontans i agns di Isi Benini e di tancj altris. Cussì Morasutti al cjape dentri il grant espert Walter Filiputti e dopo ancje il coleghe Franco Marini dal albierc “Là di Moret” di Udin. Propit achì a fasin une riunion cun altris ristoradôrs e cussì a partissin in vincj. In program vie pal an seradis in puescj maraveôs dal Friûl, ma ancje cunvignis e libris, ancje in plui lenghis. In vincjecinc agns a son stâts passe un milion i plats cerçâts, 185 lis seradis in 83 puescj (ancje tal forest), passe doi mil ricetis, cun ancje 35 mil butiliis di vin. Vie pal timp al consorzi si son zontâts tancj roncârs di vin e ancje artesans e piçui produtôrs dal mangjâ di cualitât. E il Consorzi al à tignût dongje i professioniscj dal setôr ancje tai mês plui teribii de pandemie, cuant che dutis lis ativitâts a jerin sieradis e no si saveve cuant e se si podeve tornâ a vierzi. Par festezâ, alore, chest an al è stât presentât un program siôr, simpri coordenât dal president Filiputti. La prime cene spetacul si ten ai 17 di Jugn tal cjistiel di Spesse a Caprive. La vere fieste dai 25 agns, invezit, e sarà ai 8 di Lui tal cjistiel di Udin e si podaran cerçâ i plats deventâts identitaris di ogni ristorant. Si continue ai 30 di Lui cu la cene su la splaze di Grau. A sierâ il complean e sarà une cerimonie uficiâl ai 15 di Setembar ancjemò a Udin intal palaç Antonini Stringher, cjase de Fondazione Friuli. (R.C.) – 16.04.2025