Il cine si conferme strategjic pe economie regjonâl

La FVG Film Commission – PromoTurismoFVG e à otignût tal 2025 un risultât plui che positîf, confermant il so rûl strategjic pe economie regjonâl: lis jentradis proviodudis pes ativitâts coreladis a superin i 18 milions di euros, cun 75 produzions supuartadis (cines, seriis e programs pe television, video musicâls, curtmetraçs, publicitât…)e 21 finanziadis, par un totâl di 2,6 milions di euros. Chest risultât al consolide il Friûl-Vignesie Julie tant che lûc atraent no dome par produzions locâls, ma ancje nazionâls e internazionâls. La conferme e je rivade di Sergio Emidio Bini, assessôr regjonâl pes ativitâts produtivis e il turisim. “Il sucès dal an passât – al à dit – nol è misurât dome in tiermins economics, ma di posizionament: il Friûl-Vignesie Julie al è presint a plen sui palcs di sene plui prestigjôs dal mont, cun cines che a àn vinçût premis, e al dà acet a grandis produzions nazionâls e internazionâls: par esempli ‘The Dog Stars’ dal regjist Ridley Scott, che par setemanis al è stât a Bordan.” La coordinadore de Film Commission, Chiara Valenti Omero e à nomenât in anteprime cualchi produzion che si fasarà sul teritori tal 2026: “Memoriæ”, zirade a Vençon, “L’ombra” dai fradis Manetti, cu lis ripresis di Fevrâr a Rabil, e la seconde stagjon di “Libera” fate simpri a Triest. (A.I.) – 04.02.2026