A margjin de riunion de Zonte regjonâl, che intal so cors al è stade aprovât il scheme di contrat di disvilup tra il Ministeri des Impresis e dal Made in Italy, la Regjon Friûl-Vignesie Julie, la Agjenzie Nazionâl pe Atrazion dai Invistiments e il Disvilup di Imprese Spa (Invitalia), e la societât Spin Spa (Gruppo Bracco) pal cofinanziament dal program di disvilup industriâl de unitât produtive di Tor di Zuin, l’assessôr regjonâl aes Ativitâts produtivis, Sergio Emidio Bini, al à anunziât il progjet di disvilup che al puartarà altris 50 puescj di lavôr in graciis dai 124 milions di invistiment par un procès di disvilup e di inovazion industriâl ae insegne de sostignibilitât ambientâl.
Intal detai, cemût che al à displeât l’assessôr, il progjet di disvilup industriâl al rivuarde la Spin Spa dal Gruppo Bracco, che a Tor di Zuin al prodûs mieçs di contrast par rais X intal setôr chimic-farmaceutic. Il plan al previôt l’ampliament dal sît produtîf midiant la ristruturazion di varis cuarps di fabriche e la instalazion di gnûfs implants, machinaris e furniments par un impuart complessîf previodût superiôr ai 124 milions di euros. (A.D.G.) – 12.05.2023